ANG KURING ni NOEL DE LEON

Aga, nagapanglaba si Susan sang mabatian sini ang singgit ni Bruha: Susan, ang kayudiputa! Ginkaon naman sang kuring ang sud-an sa ibabaw sang ref., abi, pangitaa inang kuring nga ina kag dal-a sa akon ang iya ulo.Ginbuy-an ni Susan ang busluton nga panti nga ginalabhan, puno sang bukal ang mga kamot sini sang ginkaptan nia ang sundang. Nagsaka sa atop, naghulat sa kusina, namalaymalay, waay ya nakita ang kuring asta nga sang ginpangsulod sini ang mga kwarto sa balay nga ginaobrahan.Waay sia sang kuring nga nakita sa kwarto ni Bruha, waay man sa kwarto sang bata ni Bruha, sa likod sang balay sa daw bodega nga nagapanimaho sunog nga dahon kon kaagahon, digto ya nakita ang dalok nga kuring, daw bukaw nga isda ang mata sang kuring sang lab-on ini ni Susan sa liog, kag ang bukal sa iya mga kamot naislan sang dugo.Nakibot si Bruha sang makita ang ulo sang kuring: Bana ko ina, bana ko ina, Susan. Ano ang gin obra mo sa iya? Ginbutang ni Susan sa ibabaw sang ref. ang ulo sang bana ni Bruha, kag naghambal samtang nagalumaw-lumaw ang mata: Nakabalos na kita sa iya ma'am, indi matuod ang siyam sini nga kabuhi.